Fjórir fluttir í skýrslutöku

Um 30 starfsmenn embættis sérstaks saksóknara hafa í dag tekið þátt í aðgerðum í tengslum við rannsókn embættis sérstaks saksóknara á ráðstöfun fjármuna VÍS vátryggingafélags. Einnig hafa lögreglumenn frá lögreglustjóranum á höfuðborgarsvæðinu tekið þátt. 

Húsleitir fóru fram á tveimur stöðum í dag á höfuðborgarsvæðinu. Fjórir  einstaklingar voru á sama tíma færðir til skýrslutöku. Yfirheyrslur hófust í morgun og búist við að þær standi fram á kvöld.

Samkvæmt upplýsingum frá embætti sérstaks saksóknara er  m.a. til rannsóknar fjöldi lánveitinga til ýmissa félaga og aðila á árunum 2007-2009. Grunur er um meint brot á auðgunarbrotakafla hegningarlaga í tengslum við ráðstafanir á fjármunum vátryggingafélagsins og brot á lögum um vátryggingastarfsemi.

Embættið segir, að um sé að tefla verulega fjárhagslega hagsmuni og rannsóknin tengist fjölda tilvika. Málinu var vísað til embættis sérstaks saksóknara með kæru frá Fjármálaeftirlitinu.

• 1 blogg um fréttina

Bloggað um fréttina

• Heimir Lárusson Fjeldsted: Grugg