Einungis sérmenntaðir heilbrigðisstarfsmenn skrifi upp á tóbak fyrir tóbaksfíkla

Samkvæmt tillögum Læknafélagsins verða skilyrði þess að fá að kaupa tóbak að viðkomandi hafi sannanlega farið tvisvar í meðferð við tóbaksfíkn og hann vilji hætta en geti það ekki.

Þegar svo er komið getur viðkomandi fengið uppáskrifaða ávísun til kaupa á tóbaki sem einungis yrði selt í apótekum. Tóbaksfíklar verði að leita til lækna, eða annarra heilbrigðisstarfsmanna, sem hlotið hafi sérmenntun í meðhöndlun fíkla.

Þeir einir verða til þess bærir að geta ávísað á tóbak, samkvæmt tillögum Læknafélagsins, sem fjallað er nánar um í Morgunblaðinu í dag.

„Tóbak er ávanabindandi fíkniefni og krabbameinsvaldandi og hvers vegna á að vera að dreifa slíkum efnum um allar grundir í óvörðu umhverfi? Reynum að halda þessum efnum frá samfélaginu,“ segir Birna Jónsdóttir, formaður Læknafélags Íslands. Hún er bjartsýn á nýtt frumvarp um tóbaksvarnir.