Enginn samhugur er í ríkisstjórn um hvort Ísland eigi að styðja áframhaldandi aðgerðir Atlantshafsbandalagsins í Líbíu. Þetta segir Ögmundur Jónasson innanríkisráðherra. Eru ráðherrar og þingmenn VG þeim mótfallnir en Össur Skarphéðinsson og fulltrúar Samfylkingar í utanríkismálanefnd fylgjandi.
Fastaráð Nató fundar í dag og verður þar tekin ákvörðun um hvort hernaðarbandalagið eigi að halda áfram að fara með yfirstjórn hernaðaraðgerða í Líbíu. Kynnti utanríkisráðherra málið í ríkisstjórn og utanríkismálanefnd í gær en samkvæmt heimildum Morgunblaðsins er afstaða hans sú að hann vilji ekki að Ísland standi í vegi fyrir frekari aðgerðum.
Segist Ögmundur hafa þurft að fara af ríkisstjórnarfundi í gærmorgun en hann hafi náð að hlýða á skýrslu utanríkisráðherra. „Ég lýsti andstöðu minni við þessi áform og ég hygg að samsvarandi afstaða hafi komið fram hjá öðrum ráðherrum VG á fundinum,“ segir hann.
„Það getur enginn tekið mark á Vinstri-grænum sem þykjast hafa hina og þessa stefnu í ýmsum málum en gera ekkert af þeim að úrslitaatriði í ríkisstjórnarsamstarfi. Þeir eru eins og gólfmottur sem Samfylkingin gengur yfir og þurrkar sér á þegar henni sýnist. Þetta er prinsipplaus flokkur,“ segir Bjarni Benediktsson, formaður Sjálfstæðisflokksins og fulltrúi í utanríkismálanefnd, um afstöðu Vinstri-grænna.Svo virðist sem í landinu sé ríkisstjórn sem geti ekki komið sér saman um nein alvörumál, að sögn Bjarna.