Varpið seint og útlitið ekki gott

Útlitið er ekki gott fyrir lunda- og kríuvarp í ár. Síendurtekinn afkomubrestur hefur orðið síðustu sumur vegna breytinga á lífríkinu í sjónum og hefur umhverfisráðherra biðlað til landeigenda að takmarka eða fella niður eggjatöku og hlunnindaveiðar í sumar vegna lélegs ástands margra sjófuglastofna.

„Þetta byrjar frekar endasleppt og maður er nú hálfkvíðinn fyrir sumrinu,“ segir Erpur Snær Hansen, líffræðingur í Vestmannaeyjum. Lundinn í Eyjum er enn ekki orpinn, en í eðlilegu árferði hefst varp þar í kringum 20. maí. „Það verður spennandi að sjá hversu mikið af þeim verpir. Ef fuglinn hefur ekki ofan í sig sjálfan þegar hann kemur þá hættir hann bara við.“ Gangi það eftir verður þetta sjöunda sumarið í röð sem varpið bregst.

Svipað má segja um kríuna á Suðvesturlandi. „Þetta lítur ekki vel út í augnablikinu, þær eru ekki mjög varplegar en þetta getur breyst fljótt,“ segir Freydís Vigfúsdóttir, doktorsnemi í líffræði sem hefur rannsakað kríuvörp á Snæfellsnesi í þrjú sumur.