Leist vel á þessa stelpu og það var gagnkvæmt

Það er ekki oft sem fólk nær því að halda upp á 70 ára brúðkaupsafmæli en hjónin Arnbjörg Sigtryggsdóttir og Lúðvík Geirsson tóku forskot á sæluna og kölluðu fjölskylduna, börnin þrjú, barnabörn og barnabarnabörn, saman hjá dótturinni á sunnudag í tilefni þess að þau gengu í hjónaband fyrir 70 árum. Brúðkaupsdagurinn er í dag og fyrsta verk dagsins verður að bjóða pottverjum í sundlaug Seltjarnarness upp á meðlæti með kaffinu.

Lúðvík er 97 ára og frá Akranesi en Arnbjörg, sem verður 93 ára í haust, er úr Mývatnssveit. Hins vegar lágu leiðir þeirra saman í Reykjavík. „Ég hafði tekið eftir þessari stelpu og mér leist vel á hana,“ rifjar Lúðvík upp en hann var húsasmiður í bænum.

„Það virðist hafa verið gagnkvæmt,“ heldur hann áfram og Arnbjörg tekur undir það. Lúðvík minnir á að fyrir 70 árum hafi íþróttafélögin í bænum reglulega verið með skemmtisamkomur og þau hafi hist á slíkri samkomu. Hann hafi unnið í ullarverksmiðjunni Framtíðinni við Frakkastíg og strax fallið fyrir þessari glæsilegu konu.

„Við giftum okkur svo á lengsta degi ársins, fórum bara til séra Bjarna (Jónssonar) og hann gaf okkur saman heima hjá sér en við bjuggum ekki saman áður.“Arnbjörg lærbrotnaði í fyrrasumar og hefur ekki náð sér almennilega. „Annars hefur okkur alltaf liðið vel, þetta hefur gengið vel hjá okkur, við höfum átt gott líf og góða heilsu,“ segir hún.