Varað við nýju lóni

Lögregla vill vara við hættu vegna nýs lóns sem myndast hefur við Gígjökul á leiðinni inn í Þórsmörk.

Menn sem nýlega voru þarna á ferð tóku eftir að myndast hefur lítið lón við jökulsporðinn. Nú er talsverð umferð þarna og hvetur lögreglan á Hvolsvelli menn sem fara þarna upp að jökli að fara mjög varlega.  Þetta á reyndar við um allt Lónstæðið gamla, segir í tilkynningu frá lögreglunni.

„Þetta er meira og minna ís hulinn þunnu malarlagi.  Ef menn fara fram á bakka „nýja lónsins“ og falla í vatnið þá er glæra ís neðan við vatnsborðið.  Litlar líkur er á því að maður nái að krafla sig upp úr slíku nema vopnaður broddum og ísöxi.  Menn eru venjulega ekki vopnaðir slíku.

Vatnið er venjulega mjög kalt á svona stöðum. Þetta er því dauðans alvara.   Að hafa langan spotta eða línu er það sem helst er til bjargar ef illa fer. Best er þó að koma sér ekki í vandræði.

Lögreglan á Hvolsvelli hvetur því fólk að fara að með öllu með gát.
Einnig ítrekar lögreglan að utanvegaakstur er með öllu óheimill," segir í tilkynningu frá lögreglu. 

• 1 blogg um fréttina

Bloggað um fréttina

• Ómar Ragnarsson: Hin heillandi náttúra landsins.