Innlent | mbl | 28.6.2011 | 16:09

Ræddi við framkvæmdastjórn ESB

Össur Skarphéðinsson utanríkisráðherra í Brussel. Reuters

Össur Skarphéðinsson utanríkisráðherra átti í dag og í gær fundi með þremur yfirmönnum framkvæmdastjórnar Evrópusambandsins, auk tveggja fulltrúa Evrópuþingsins.Hann ítrekaði vilja Íslendinga að hefja viðræður um allt að helming samningskaflanna fyrir árslok, þ.á.m. samningskafla um sjávarútveg og landbúnað.

Utanríkisráðuneytið segir að fundirnir hafi verið í framhaldi ríkjaráðstefnu ESB og Íslands í Brussel, þar sem eiginlegum samningaviðræðum var hrundið úr vör með opnun fjögurra fyrstu kaflanna.

„Á fundi utanríkisráðherra með Stefan Fule, stækkunarstjóra ESB, voru efnisatriði og fyrirkomulag aðildarviðræðna Íslands við Evrópusambandið til umræðu. Utanríkisráðherra ítrekaði þann vilja Íslendinga að hefja viðræður um allt að helming samningskaflanna fyrir árslok, þ. á m. samningskafla um sjávarútveg og landbúnað.

Utanríkisráðherra fundaði með Mariu Damanaki, sem fer með sjávarútvegsmál í framkvæmdastjórn Evrópusambandsins. Þau ræddu endurskoðun sjávarútvegsstefnu ESB, samningaviðræðurnar framundan og stöðuna í makrílviðræðum Íslendinga, Norðmanna, Færeyja og Evrópusambandsins,“ segir í tilkynningu frá utanríkisráðuneytinu.

„Ráðherra hitti einnig Olla Rehn sem fer með efnahags- og gjaldeyrismál í framkvæmdastjórninni. Utanríkisráðherra kynnti efnahagsáætlun Íslands og Rehn gerði grein fyrir aðgerðum ESB til að tryggja efnahagsstöðugleika á evrusvæðinu og breytingum á fjármálaregluverki ESB.

Utanríkisráðherra fundaði að lokum með þýska þingmanninum Martin Schultz, sem fer fyrir hópi jafnaðarmanna á Evrópuþinginu. Þeir ræddu aðildarviðræðurnar og hlutverk Evrópuþingsins í þeim. Ráðherra ræddi ennfremur við Steffen Weber, framkvæmdastjóra Norðurskautsvettvangs Evrópusambandsins og ráðgjafa Evrópuþingsins um norðurslóðir, um mögulegt samstarf Íslands og Evrópusambandsins í málefnum norðurslóða,“ segir ennfremur.