Gengu út af fundi hvalveiðiráðsins

Fulltrúar Íslands, Japans, Noregs og nokkurra Karíbahafs- og Afríkuríkja gengu út af fundi Alþjóðahvalveiðiráðsins í Jersey í dag til að mótmæla tillögu frá Brasilíumönnum og Argentínumönnum um hvalafriðunarsvæði í Suður-Atlantshafi.

Tómas Heiðar, formaður íslensku sendinefndarinnar, sagði við Útvarpið, að með þessu hefði verið komið í veg fyrir að greidd yrðu atkvæði um tillöguna, sem lögð var fram af Brasilíumönnum og Argentínumönnum.

Tillagan snýst um, að stofnað verði griðasvæði fyrir hvali í Atlantshafi sunnan miðbaugs. Tillagan er fyrst og fremst táknræn því fáir hvalir eru veiddir á þessum slóðum.

Tómas sagði, að tillagan hefði verið til umræðu í tengslum við málamiðlun, sem reynt var að ná um takmarkaðar hvalveiðar á síðasta ársfundi ráðsins en sú málamiðlun náði ekki fram að ganga.

• 1 blogg um fréttina

Bloggað um fréttina

• Einar Guðjónsson: Kjánalegt.