15 verslanir sektaðar

Neytendastofa hefur sektað verslanir í Kringlunni og Smáralind þar sem þær fóru ekki að tilmælum stofunnar um verðmerkingar í verslunum. Alls voru fimmtán verslanir sektaðar.

Neytendastofa kannaði ástand verðmerkinga hjá verslunum í Kringlunni og Smáralind. Margar af þeim verslunum sem gerðar voru athugasemdir við bættu merkingar sínar en nokkrar þeirra fóru ekki að tilmælum Neytendastofu. Því hefur Neytendastofa nú sektað þær fyrir ófullnægjandi verðmerkingar.

Verslunum ber skylda til að verðmerkja allar söluvörur sínar, jafnt í verslun sem og í sýningargluggum sínum.

Í Smáralind var ástandi verðmerkinga ábótavant í tveimur verslunum og í 13 verslunum í Kringlunni. Ýmist voru söluvörur í verslunum eða í búðargluggum verslana óverðmerktar. Í nokkrum verslunum voru bæði söluvörur í verslun og búðarglugga óverðmerktar. 

Verslununum var öllum gefinn kostur á að koma verðmerkingum sínum í lag en þar sem þær fóru ekki að tilmælum Neytendastofu hefur stofnunin lagt á þær stjórnvaldssektir allt frá 50.000 kr. til 200.000 kr. 

• 1 blogg um fréttina

Bloggað um fréttina

• Axel Jóhann Hallgrímsson: Bannað að verðmerkja en sektað fyrir að verðmerkja ekki