Greiði Stapa 5,2 milljarða

Héraðsdómur Reykjavíkur dæmdi í dag ALMC, sem hét áður Straumur-Burðarás fjárfestingarbanki, til að greiða Stapa lífeyrissjóði tæpa 5,2 milljarða króna. Um er að ræða kröfur,  sem var lýst of seint í bú bankans vegna mistaka lögmannsstofu.

Lífeyrissjóðurinn taldi, að krafan ætti að halda gildi sínu og fá sömu meðferð og aðrar kröfur, þar sem Straumur-Burðarás (nú ALMC hf.) hafi náð nauðasamningum við kröfuhafa  sína, en ekki farið í gjaldþrot.

Undir þetta tekur héraðsdómur. Í niðurstöðu dómsins segir, að nauðasamningur, sem gerður er eftir að félag hefur verið tekið til gjaldþrota­skipta, leiði til þess að fjárhæð krafna og skilmálar breytast eftir því sem samningurinn mæli fyrir um.  Gjaldþrotaskiptunum sé hætt og stjórn félagsins taki aftur við forræði á hagsmunum þess og skuldbindingum. 

Kröfuhafi, sem komst ekki að við skiptin vegna þess að hann lýsti ekki kröfu sinni, geti krafist greiðslu kröfu sinnar, en verði að sæta lækkun hennar í samræmi við skilmála nauðasamningsins. 

Segir dómurinn, að af þessu leiði, að kröfur sem komust ekki að við skiptin, hafi ef svo má segja vaknað til lífs á ný þar sem skuldari þeirra sé ekki lagður niður.  Engin heimild sé í lögum til þess að telja kröfur falla alveg niður þó þeim hafi ekki verið lýst við gjaldþrotaskipti eða slitameðferð. 

Stapi lífeyrissjóður.

• 2 blogg um fréttina

Bloggað um fréttina

• Páll Vilhjálmsson: Héraðsdómur: kröfur vakna til lífs en glæpir sofna
• Erlingur Alfreð Jónsson: #123. Athyglisverður dómur