Líflegri Laugavegur eftir að bílum fækkaði

Sú tilraun að gera hluta af Laugaveginum að göngugötu hefur skilað sér í líflegra götulífi ef marka má mælingar sem gerðar hafa verið, samkvæmt frétt á vef Reykjavíkurborgar. Þar eru bornar saman tölur milli júní og júlí.

Þær sýna að gangandi og hjólandi vegfarendum hefur á síðustu vikum fjölgað umtalsvert á göngugötunni sem markast af Vatnsstíg og Skólavörðustíg.

Þannig voru gangandi vegfarendur á degi hverjum í byrjun júní um níu þúsund á mörkum Laugavegar og Skólavörðustígs en tæplega fjórtán þúsund þegar talið var þriðjudaginn 12. júlí. Mælingar staðfesta jafnframt að fleiri fara inn í flestar verslanir við göngugötuna.