Standa á brauðfótum

Íbúðalánasjóður og viðskiptabankarnir þurfa að afskrifa marga milljarða vegna fasteignafélaga sem bjóða íbúðir til leigu. Íbúðalánasjóður hefur sett 12,4 milljarða á afskriftareikning vegna lánveitinga til lögaðila, þar af eru sjö milljarðar vegna varúðarafskrifta.

Verið er að undirbúa útgáfu á reglugerð sem auðveldar Íbúðalánasjóði að taka á vanda þessara fyrirtækja. Gunnhildur Gunnarsdóttir, staðgengill forstjóra Íbúðalánasjóðs, segir ljóst að ekki muni öll fyrirtæki á húsaleigumarkaði standast reglurnar og því sé ekki grundvöllur fyrir rekstri þeirra.

Í umfjöllun um þessi mál í Morgunblaðinu í dag kemur fram, að verið sé að fara yfir gögn frá félögunum og meta rekstrarhæfi þeirra til framtíðar. Misjafnt er hvernig félög sem standa að útleigu á félagslegu húsnæði standa. Staðan er góð hjá Öryrkjabandalaginu, en mjög misjöfn hjá námsmannafélögum. Þá eiga einstök sveitarfélög í vandræðum með að standa í skilum með lán vegna félagslegs húsnæðis.