Stunginn fimm stungum

Íslenskur karlmaður, 36 ára gamall, liggur á sjúkrahúsi í Amsterdam í Hollandi eftir heiftuga hnífstunguárás í gærkvöldi. Maðurinn var á ferðalagi um Evrópu ásamt tveimur félögum sínum.

Þeir fengu sér gönguferð í gærkvöldi og fóru m.a. í hraðbanka. Skyndilega kom maður aftan að þeim og stakk einn þeirra í bakið.

„Hann var stunginn fimm stungum,“ sagði faðir mannsins sem særðist í árásinni. Maðurinn var fluttur á sjúkrahús þar sem hann gekkst undir aðgerð í gærkvöldi. Hann fór í aðra aðgerð í nótt vegna innvortis blæðinga. 

Sá særði var vakinn nú síðdegis og töldu læknarnir viðbrögð hans lofa góðu um bata. Hann er ekki talinn vera í lífshættu. 

Félagar þess sem ráðist var á sögðu að árásarmaðurinn hafi verið „snarbrjálaður“ þar sem hann réðist óvænt á manninn. Þeir sögðu að vettvangurinn hafi verið eins og vígvöllur. Félagana tvo sakaði ekki.

Mennirnir þrír voru langt komnir í rúmlega hálfsmánaðar langri ferð sinni um Evrópu og ætluðu að halda frá Amsterdam í dag. 

• 1 blogg um fréttina

Bloggað um fréttina

• Gunnar Th. Gunnarsson: Groningen: Faestir glaepir, flest hjol