Páll Óskar rak niður fleyg

Sólin er byrjuð að skína á þjóðhátíðargesti í Vestmannaeyjum. Páll Scheving, formaður þjóðhátíðarnefndar, segist ánægður með í hversu góðu skapi og glaðir gestir hafi verið í gær.

„Það fór allt vel fram. Það stytti upp frá því um kvöldmat og hélst þurrt fram yfir brennu. Við vorum hér í blíðu veðri. Það er sól og blíða núna. Það er vonandi að það tolli þannig áfram,“ segir Páll.

Þjóðhátíðarlagið í ár, „La Dolce Vita“ með Páli Óskari, hefur valdið nokkrum núningi vegna þess að það er diskólag og titill þess á erlendu máli. Páll segir hins vegar að nafni sinn Óskar hafi rekið niður fleyg í þær umræður með flutningi sínum á laginu í gærkvöldi.

„Hann sýndi að það er ágætt að breyta til. Mér sýndist það að minnsta kosti  í gærkvöldi að þetta lag ætti sér tilverurétt,“ segir Páll.

• 1 blogg um fréttina

Bloggað um fréttina

• Gísli Foster Hjartarson: Raðfullnæing í Herjólfsdal ...partur 2