Segja neyðarástand ríkja

Stjórn Verkalýðsfélags Vestfirðinga hvetur Byggðastofnun, Landsbanka Íslands og skiptastjóra þrotabús Eyrarodda til að höggva á hnút óvissu í atvinnumálum Flateyringa.

„Algjört neyðarástand hefur ríkt á meðan áðurnefndir aðilar hafa dregið lappirnar og þvælst hver fyrir öðrum í ákvarðanatöku með þeim afleiðingum að fiskvinnsla er nánast að leggjast af á Flateyri. Þeirri hvatningu er beint til valdhafa ásamt peningaöflum og skiptaráðanda að sýna áræðni og stórhug í ákvarðanatöku um framtíð fiskvinnslu á Flateyri.

Hætta er á að algjör fólks flótti bresti á verði ekki gripið til bráðaaðgerða svo hægt verði að hefja vinnslu á Flateyri að nýju. Neyðarkalli heimamanna frá því í vetur hefur enn ekki verið svarað þannig að hægt sé að byggja á til framtíðar. Stjórnarfundurinn fordæmir þau vinnubrögð sem áðurnefndir aðilar hafa viðhaft og skorar á Byggðastofnun, Landsbankann og skiptaráðanda sem hafa atvinnulíf Flateyringa í heljargreipum, að hætta að benda hver á annan og höggva á hnútinn, og það strax," segir í ályktun stjórnar verkalýðsfélagsins.

• 1 blogg um fréttina

Bloggað um fréttina

• Óskar: Hið árlega Vestfjarðavæl hafið