Telur að Már eigi að víkja

Seðlabanki Íslands hækkaði vexti nú í morgun um 0,25 prósent, en heitar umræður hafa skapast um aðgerðir Seðlabankans á Facebook í dag. Hér að neðan má sjá stöðuuppfærslur frá Bjarna Benediktssyni og Óla Birni Kárasyni.

Kallar á þjóðarsátt

Bjarni Benediktsson, formaður Sjálfstæðisflokksins, segir á Facebook-síðu sinni að vaxtahækkun Seðlabankans sé óskiljanleg við núverandi aðstæður. Hann segir ennfremur að það sé grafalvarlegt að Seðlabankinn telji að verðbólgan fari í 6,8% og verði há fram á síðari hluta 2013.„Þá telja þeir að hagvöxtur á næsta ári verði aðeins 1,9%. Það þarf nýja ríkisstjórn og þjóðarsátt sem varðar leiðina út úr þeirri stöðu sem upp er komin.“

Skuldabyrði mun ekki minnka

„Það verða ekki til fleiri störf hér á landi með hærri vöxtum, fjárfestingar munu ekki aukast, skuldabyrði heimila og fyrirtækja mun ekki minnka. Þvert á móti,“ segir Óli Björn Kárason, ritstjóri T24, á Facebook-síðu sinni en hann segir í pistli sínum að Már Guðmundsson, seðlabankastjóri, eigi að víkja.