Reyndu báðir að taka fram úr

Umferðarslysið sem varð til móts við bæinn Háls í Fnjóskadal um klukkan 16:00 í dag gerðist með þeim hætti að fólksbifreið, rúta og jeppi voru í röð á eftir dráttarvél með heyflutningavagn þegar fólksbíllinn ákvað að taka fram úr dráttarvélinni.

Rútan reyndi þá einnig framúrakstur á sama tíma og jeppinn ætlaði að taka fram úr rútunni. Við það rakst jeppinn lítillega á rútuna sem aftur skall á dráttarvélinni með þeim afleiðingum að dráttarvélin ásamt heyflutningavagninum lenti utan vegar.

Samkvæmt upplýsingum frá lögreglunni á Akureyri voru ökumenn einir í öllum ökutækjunum og voru ökumenn rútunnar og dráttarvélarinnar fluttir á fjórðungssjúkrahúsið á Akureyri til skoðunar. Er ekki talið að meiðsl þeirra séu alvarleg en það liggur þó ekki fyrir á þessari stundu.

Vill lögreglan af þessu tilefni brýna það fyrir ökumönnum að gæta fyllstu varúðar þegar tekið er fram úr öðrum bifreiðum eða öðrum ökutækjum.

• 1 blogg um fréttina

Bloggað um fréttina

• Sigurður Haraldsson: Kemur ekki á óvart!