Pústrar, hrindingar og högg

Töluverður erill var hjá lögreglunni á höfuðborgarsvæðinu í nótt og var tilkynnt um sjö líkamsárásir í miðborg Reykjavíkur. Engin þeirra var alvarleg, „meira og minna pústrar, hrindingar og högg,“ að sögn lögreglu.

Flestar þeirra áttu sér stað frá klukkan tvö í nótt og fram að klukkan sjö, en þá var enn töluvert af fólki í miðborginni.

Maður sagðist hafa verið laminn í Austurstræti og annar var rotaður eftir slagsmál í Bankastræti. Þá var maður á ferli á Ingólfstorgi þegar annar kom aðvífandi og kýldi hann í andlitið þannig að hann féll við og rotaðist. Hann var fluttur á slysadeild.

Dyravörður Hressingarskálans í Austurstræti var laminn um fjögur leytið þegar upp kom ágreiningur við einn af gestum staðarins og fór hann sjálfur á slysadeild.

Rétt fyrir klukkan sex í morgun var tilkynnt um að maður af erlendum uppruna hefði  lamið þrjá menn á Lækjartorgi og um svipað leyti var maður sleginn í höfuðið við Hlöllabáta á Ingólfstorgi.

Rétt eftir klukkan sex í morgun var maður sleginn með flösku í höfuðið á Sæbraut. Af því hlaust töluverð blæðing og var hann fluttur með sjúkrabíl á slysadeild.

• 3 blogg um fréttina

Bloggað um fréttina

• Halldór Sigurðsson: Myndir og myndbönd frá menningarnótt 2011
• Sigríður Sigurðardóttir: Nótt hinna þungu menningarhögga?/Ferðaævintýr.
• Haraldur Haraldsson: Pústrar, hrindingar og högg/þett á bara að vera meningar dagur …