„Ekki farið að bullsjóða í pottunum“

„Það er erfitt að meta hver áhrifin verða á flokkinn hér. Það var vitað að það voru ekki allir sáttir eftir síðasta flokksþing en það er ekki hægt að lesa í flokksmenn almennt, hvað þeir gera í framhaldi af þessu. Ég myndi ekki segja að það væri ólga í mönnum en það er ákveðinn pirringur. Það er ekkert farið að bullsjóða í pottunum,“ segir Sigurður Hreinsson, formaður Framsóknarfélags Ísafjarðar við vefinn bb.is.

Guðmundur Steingrímsson hefur sagt sig úr Framsóknarflokknum   en Guðmundur var þingmaður flokksins í Norðvesturkjördæmi. Guðmundur hefur sagt að telji að þörf sé á nýju stjórnmálaafli í landinu. 

„Við höfum átt í ágætu samstarfi við Guðmund og það er vonandi að það þurfi ekki að breytast. Við vonumst eftir því að fá hann á fund til okkar þar sem hann fer yfir málin með okkur. Ég á ekkert sérstaklega von í því að það verði ályktað um þessa úrsögn hjá honum. Ég hef ekki heyrt að því að neinn héðan hafi sagt sig úr flokknum en það hafa auðvitað stórar kanónur farið á undanförnum dögum,“ segir Sigurður.

• 2 blogg um fréttina

Bloggað um fréttina

• Viggó Jörgensson: Hætti úr af komu Ásmundar Einars.
• Heimir Lárusson Fjeldsted: Vistaskiptin draga dilk