Innlent | mbl | 24.8.2011 | 20:28 | Uppfært 20:58

Funduðu um fjárfestingar

Huang Nubo.

Össur Skarphéðinsson utanríkisráðherra átti í dag fund með Huang Nubo, stjórnarformanni kínverska fjárfestingarfyrirtækisins Zhongkun Group. Greindi Nubo þar ráðherranum frá fyrirætlunum fyrirtækisins um að fjárfesta í umhverfistengdri ferðaþjónustu á Íslandi, og taka þátt í uppbyggingu ferðaþjónustu í samstarfi við íslensk stjórnvöld.

Gerð er grein fyrir áhuga Nubu í tilkynningu frá utanríkisráðuneytinu.

Segir þar að fyrirtæki Nubo hafi áform um hótelrekstur, bæði í Reykjavík og á Norðausturlandi. Um þessar mundir vinni fyrirtækið að verkefni fyrir norðan sem m.a. tengdust Grímsstöðum á Fjöllum. Verði þær fyrirætlanir að veruleika hyggist fyrirtækið leggja sitt af mörkum, í samstarfi við stjórnvöld, til að tengja saman meginsvæði Vatnajökulsþjóðgarðs við land þjóðgarðsins í Jökulsárgjúfrum.

„Það færi vel saman við áherslur fyrirtækisins um náttúruvernd og umhverfistengda ferðaþjónustu. Ennfremur kom fram að fyrirtækið er reiðubúið til að afsala sér vatnsréttindum í Jökulsá á Fjöllum og að verkefnið yrði að öllu leyti unnið í náinni samvinnu við íslensk stjórnvöld og heimamenn.

Utanríkisráðherra sagðist fagna erlendri fjárfestingu og uppbyggingu í ferðaþjónustu, sér í lagi á landsbyggðinni, en m.a. lægi fyrir að sveitarfélagið Norðurþing hefði tekið vel í hugmyndir fyrirtækisins. Það þyrfti þó að skoða hvert verkefni vandlega í samvinnu allra hlutaðeigandi aðila og hafa náið samráð um næstu skref. Til þess væru íslensk stjórnvöld svo sannarlega reiðubúin,“ segir í tilkynningu frá ráðuneytinu.

Huang Nubo kom til Íslands í fyrrahaust á ljóðahátíð sem hann stóð fyrir í Norræna húsinu með Kínversk-íslenska menningarfélaginu en hann er styrktaraðili félagsins.

Huang og Hjörleifur Sveinbjörnsson þekkjast frá fornu fari, gengu á norðurpólinn í vor í hópi manna, ásamt sonum sínum. Áður hafði Huang, sem er þjálfaður fjallgöngumaður, farið á suðurpólinn og gengið á sjö hæstu tinda heims.

Huang er stjórnarformaður Beijing Zhongkun Investment Group, sem á tvö dótturfélög í Bandaríkjunum. Hann var í 161. sæti á lista Forbes yfir 400 ríkustu einstaklinga í Kína sem birtur var í lok síðasta árs. Þar var verðmæti eigna hans reiknað sem 890 milljónir dala, eða jafnvirði nær 102 milljarða króna.