Innlent | mbl | 12.9.2011 | 14:41 | Uppfært 14:57

Ræddu við Bandaríkjamenn um hvalveiðar

Hvalveiðiskip Hvals hf. í Reykjavíkurhöfn.

Tómas H. Heiðar, aðalfulltrúi Íslands í Alþjóðahvalveiðiráðinu, og Hjálmar W. Hannesson, sendiherra Íslands í Washington, áttu á föstudag fundi í Washington með bandaríska utanríkisráðuneytinu og starfsmönnum beggja öldungadeildarþingmanna Alaska, Lisu Murkowski og Mark Begich.

Að sögn íslenska sjávarútvegsráðuneytisins var markmiðið með fundunum að bregðast við staðfestingarkæru viðskiptaráðherra Bandaríkjanna á hendur Íslandi vegna hvalveiða, sem gefin var út í júlí og upplýsa bandarísk stjórnvöld og þingmenn um stefnu Íslands í hvalveiðimálum. Bandaríkjaforseti þarf að tilkynna Bandaríkjaþingi fyrir 17. september hvort hann hyggist grípa til aðgerða gegn Íslendingum.

Á fundunum var lögð á það áhersla af Íslands hálfu að hvalveiðar Íslendinga væru fyllilega löglegar og alþjóðleg viðskipti þeirra með hvalaafurðir í fullu samræmi við alþjóðlegar skuldbindingar. Jafnframt var undirstrikað að veiðar á hrefnu og langreyði væru sjálfbærar og byggðar á traustum vísindalegum grundvelli. Í ljósi alls þessa var lýst undrun á útnefningu Íslands samkvæmt Pelly-ákvæðinu, enda væri hvorki lagalegur né vísindalegur grundvöllur fyrir henni og þeim aðgerðum sem lagðar hefðu verið til gegn Íslandi.

Fram kemur í tilkynningu ráðuneytisins, að fulltrúar Íslands bentu á að bandarísk stjórnvöld væru ekki sjálfum sér samkvæm þegar þau gagnrýndu annars vegar veiðar Íslendinga á langreyði en leituðu hins vegar eftir stuðningi Íslands og annarra aðildarríkja Alþjóðahvalveiðiráðsins við veiðar Bandaríkjamanna á norðhval frá Alaska.

Ráðuneytið segir, að fyrir liggi að langreyðarveiðar Íslendinga séu sjálfbærar engu síður en norðhvalsveiðar Bandaríkjamanna. Ákvörðun verði tekin um kvóta Bandaríkjanna á norðhval til fimm ára á ársfundi ráðsins í Panama á næsta ári og þurfi Bandaríkin stuðning 3/4 hluta aðildarríkjanna til að kvótinn verði samþykktur.