Innlent | mbl | 20.9.2011 | 22:11 | Uppfært 22:48

Hyggja á framboð til Alþingis

Guðmundur Steingrímsson og Birkir Jón Jónsson, fyrrum samherji. Golli / Kjartan Þorbjörnsson

Guðmundur Steingrímsson, fyrrverandi þingmaður Framsóknarflokksins, ætlar að stofna nýjan stjórnmálaflokk í samstarfi við Besta flokkinn, að því er fréttastofa RÚV greindi frá. Stefnt er að framboði í næstu þingkosningum.

Morgunblaðið greindi frá því á föstudag að Guðmundur hefði að undanförnu átt í viðræðum við ákveðna fulltrúa Besta flokksins og ákveðna meðlimi úr stjórnlagaráði um hugsanlega stjórnmálasamvinnu á landsvísu.

Þá voru þessar umræður ekki langt á veg komnar, skv. heimildum blaðsins, og þegar Morgunblaðið spurði Guðmund Steingrímsson um málið á fimmtudag, þ.e. hvernig viðræðurnar gengju, vildi hann hvorki játa því né neita að slíkar viðræður stæðu yfir. Hann sagði ótímabært að tjá sig um málið.

Guðmundur sagði sig úr Framsóknarflokknum í lok ágúst. Hann sagði þá í samtali við Morgunblaðið að hann teldi þörf á nýju stjórnmálaafli hér á landi. „Það er ekki rétt að ég sé á leiðinni í Samfylkinguna á nýjan leik. Ég held að ég eigi samleið með frjálslyndu fólki úr Framsóknarflokknum, Sjálfstæðisflokknum og Samfylkingunni og raunar einnig að hluta til úr Vinstri grænum,“ sagði Guðmundur m.a.