Innlent | mbl | 26.9.2011 | 10:32 | Uppfært 19.12.2011 10:47

Vill fjárfesta annars staðar á Norðurlöndum

Huang Nubo vill byggja upp ferðaþjónustu víðar á Norðurlöndum. Ernir Eyjólfsson

Kaup Huang Nubo á Grímsstöðum á Fjöllum gæti orðið stökkpallur fyrir fasteignakaup hans annars staðar á Norðurlöndum. Kemur þetta fram á fréttaveitunni Bloomberg.

Kínverski milljaðramæringurinn hefur á stefnuskránni að byggja upp ferðamannastaði í löndum eins og Danmörku, Finnlandi og Svíþjóð innan fimm ára. Það verður þó ekki jafn umfangsmikið og verkefni hans hér á landi. „Ég mun kaupa land og byggja upp ferðamannasvæði á Norðurlöndunum, en það verður ekki eins umfangsmikið og á Íslandi,“ sagði Huang.

Huang býst við því að ríkisstjórn Íslands taki ákvörðun um kaup hans á Grímsstöðum á næstu tveimur vikum. „Þessi samningur er góður og hann er líka góður fyrir vöxt minn annars staðar á Norðurlöndum. Ef það hefði ekki orðið efnahagskreppa í heiminum væri landið ekki til sölu. Auðvitað eigum við að kaupa á lágu verði. Ef ég fæ landið á Íslandi mun ég stækka starfsemi mína til annarra landa á Norðurlöndum,“ sagði Huang.

Huang er stjórnarformaður fjárfestingarfélagsins Zhungkun sem sérhæfir sig í fasteignaviðskiptum og ferðaþjónustu. Hann hyggst reisa lúxushótel og gera golfvöll á Grímsstöðum á Fjöllum.