Innlent | mbl | 27.9.2011 | 21:50

Lýsa furðu á ummælum þingmanns

Ólína Þorvarðardóttir, þingmaður Samfylkingar

Landssamband lögreglumanna (LS)lýsir furðu sinni á ummælum Ólínu Þorvarðardóttur, þingmanns Samfylkingarinnar, í garð lögreglumanna í Síðdegisútvarpi Rásar 2 í dag.

Ólína lagði þar til að liðsmenn björgunarsveita stæðu heiðursvörð um Alþingi við setningu þess á laugardag, í stað lögreglumanna.

Í ályktun sem LS sendi frá sér segir að ummæli Ólínu séu „til þess ætluð að skaða virðingu lögreglumanna og sett fram af þekkingarleysi hennar á tildrögum þess að lögreglustjóri lögreglunnar á höfuðborgarsvæðinu tók ákvörðun um að heiðursvörður lögreglumanna yrði ekki staðinn við þingsetningu 1. október nk. Sú ákvörðun tengist kjarabaráttu lögreglumanna ekki á nokkurn hátt og er samtökum lögreglumanna algerlega óviðkomandi“.

Er Ólína hvött til þess að kynna sér staðreyndir málsins og biðja lögreglumenn afsökunar á ummælum sínum.