„Við erum mjög döpur“

„Við erum mjög döpur yfir þessum fjárlögum,“ segir Jón Helgi Björnsson forstjóri Heilbrigðisstofnunar Þingeyinga. „Það er búið að lækka kostnað hér um 24% á síðustu þremur árum og þessi niðurskurður kemur ofan í það. það er engin fita lengur í stofnunni sem hægt er að skera af þannig að þetta kemur beint niður á þjónustunni sem við erum að veita,“ segir Jón Helgi við Fréttavef Morgunblaðsins.

Jón Helgi vill ekki nefna eitthvað öðru fremur. „Nei, þetta mun koma við stofnunina alla; þjónusta sjúkrahússins er öll undir. Ég held það verði mjög erfitt að halda henni óbreyttri og mér sýnist því að eitthvað af þjónustunni verði að flytja inn á Akureyri.“

Forstjórinn segist vonast til þess að frumvarpið verði endurskoðað því sér finnist allt of hart fram gengið.

„Þegar þessar tillögur bætast við niðurskurð síðustu ár er niðurskurðurinn í raun 33%, og ef við tökum gengisáhrif inn í dæmið má segja að niðurskurðurinn sé um 36%.“ Það segir hann gríðarlega mikið því erfitt sé að veita þjónusta í jafn dreifðri byggð og stofnunin sinnir.

„Við Þingeyingar eru líka mjög ósáttir við að á sama tíma og við erum beðnir um að vera tilbúnir undir stórfellda atvinnuuppbyggingu, og höfum samning við stjórnvöld þar að lútandi, skuli hið opinbera skera mikilvægustu opinberu þjónustuna í Þingeyjarsýslu meira niður en annars staðar. Okkur finnst því engin skynsemi í þessum tillögum.“

• 1 blogg um fréttina

Bloggað um fréttina

• Haraldur Haraldsson: „Við erum mjög döpur“/það á að fara hart í að …