Niðurdæling eykur ekki líkur á stærri skjálftum

Orkustofnun segir að niðurdæling affalsvatns við Hellisheiðarvirkjun auki ekki líkur á því að stærri jarðskjálftar geti myndast á svæðinu.

Það er niðurstaða Orkustofnunar eftir úttekt að sérfræðingar á þessu sviði geti sagt með nokkru öryggi að niðurdæling auki ekki líkur á því að stærri jarðskjálftar en þeir sem verði án niðurdælingar geti myndast á svæðinu. Hins vegar gætu staðbundnar tilfærslur á spennum haft áhrif í þá átt að flýta stærri skjálftum sem eru í aðsigi.

Þetta kemur fram á vef Orkustofnunar.

Þar segir að allar líkur séu til þess að smám saman dragi úr smáskjálftavirkni á svæðinu eftir því sem niðurdælingin standi lengur.

„Þrýstingur hefur hækkað í mæliholum í nágrenninu og fer enn aðeins hækkandi. Hann mun ná jafnvægi með tímanum og smáskjálftavirknin sem tengist niðurdælingunni þá hætta að mestu. Spenna af völdum jarðskorpuhreyfinga mun þó halda áfram að byggjast upp og losna úr læðingi með jarðskjálftum af og til. Þeir jarðskjálftar munu hugsanlega verða fleiri og minni en hefði orðið án niðurdælingar. Með bættri vöktun á skjálftavirkni liggja nákvæmar upplýsingar um þessa smáskjálfta fyrir. Framsetning þessara upplýsinga þarf þó að vera með þeim hætti að almenningur sé upplýstur um takmörkuð áhrif slíkra skjálfta og hafi vitneskju um þá náttúrulegu skjálftavirkni sem alltaf er fyrir hendi á háhitasvæðum.

Þá ber að hafa í huga að þykkt jarðskorpunnar og styrkur bergsins á þessu svæði er það takmarkaður að mestu skjálftar geti ekki orðið meiri en um 6 á Richter kvarða,“ segir á vef Orkustofnunar.

• 1 blogg um fréttina

Bloggað um fréttina

• S i g u r ð u r S i g u r ð a r s o n: Hver ber ábyrgð og hverjum má treysta?