Skortur á starfsfólki vandamál fyrirtækja

Fimmta hvert (18%) aðildarfyrirtæki SA telur skort á ófaglærðu starfsfólki vera eitt af helstu vandamálum fyrirtækisins við núverandi aðstæður. Skortur á starfsfólki með starfs- og framhaldsmenntun er eitt af helstu vandamálum 13% fyrirtækja og eitt af hverjum tíu fyrirtækjum nefnir skort á háskólamenntuðu fólki. Þetta kemur fram í nýrri könnun SA um vinnumarkaðinn og efnahagshorfur.

Þetta vekur athygli í ljósi þess að 11.900 voru skráðir atvinnulausir í ágústlok. Sérstaklega er athyglisvert að mestur skortur er á ófaglærðu starfsfólki en helmingur atvinnulausra telst til þess hóps, 6.000 manns, samkvæmt upplýsingum frá Samtökum atvinnulífsins.

Samkvæmt könnuninni telja 7% fyrirtækjanna skort á starfsfólki vera helsta vandamál fyrirtækisins. Skortur á ófaglærðu starfsfólki háir þessum fyrirtækjum mest, þar á eftir kemur skortur á starfsfólki með starfs- og framhaldsmenntun og loks skortur á háskólamenntuðu fólki.

Stjórnvöld hafa lýst yfir vilja sínum til að vinna með aðilum vinnumarkaðarins að tilraunaverkefni um þjónustu við atvinnulausa í því skyni að stuðla m.a. að virkari vinnumarkaðsaðgerðum og vinnumiðlun.

Taki aðilar vinnumarkaðarins að sér faglega stýringu verkefnisins verður nálægð við þá sem eru atvinnulausir og við vinnumarkaðinn meiri en nú er. Markmiðið er að bæta þjónustu við atvinnulausa, nýta öflugri úrræði og virkari vinnumiðlun.

Þessi niðurstaða könnunar SA staðfestir að leita þarf nýrra leiða til að auka virkni vinnumiðlunar, samkvæmt upplýsingum frá Samtökum atvinnulífsins.

• 2 blogg um fréttina

Bloggað um fréttina

• Guðrún María Óskarsdóttir.: Þarfnast frekari útskýringa við.
• Gunnlaugur I.: Atvinnuleysisstyrkir greinilega misnotaðir, samkvæmt þessu. Eitthvað mikið er að !