10.700 án atvinnu

Á þriðja ársfjórðungi voru að meðaltali 10.700 manns án vinnu og í atvinnuleit eða 5,9% vinnuaflsins. Atvinnuleysi mældist 5,6% hjá körlum og 6,2% hjá konum. Frá þriðja ársfjórðungi 2010 til annars ársfjórðungs 2011 fækkaði atvinnulausum um 1.000 manns.

Þegar litið er til aldurs var atvinnuleysi mest meðal fólks á aldrinum 16–24 ára eða 9,5%. Hjá hópnum 24–54 ára var atvinnuleysi 5,1% og 5% hjá 55–74 ára. Á þriðja ársfjórðungi 2011 var atvinnuleysi 7% á höfuðborgarsvæðinu en 3,7% utan þess, segir á vef Hagstofu Íslands.

Langtímaatvinnulausum fjölgar

Af þeim sem voru atvinnulausir á þriðja ársfjórðungi 2011 voru að jafnaði 1.600 manns búnir að vera atvinnulausir í 1–2 mánuði eða 14,9% atvinnulausra. Til samanburðar höfðu 2.000 manns verið atvinnulausir í 1–2 mánuði á þriðja ársfjórðungi 2010 eða 16,8% atvinnulausra. Þeir sem hafa verið atvinnulausir í 12 mánuði eða lengur eru skilgreindir sem langtímaatvinnulausir. Á þriðja ársfjórðungi 2011 höfðu um 3.100 manns verið atvinnulausir svo lengi eða 29,1% atvinnulausra. Á þriðja ársfjórðungi 2010 voru þeir sem höfðu verið atvinnulausir ár eða lengur um 2.700 manns eða 23,1% atvinnulausra. Langtíma-atvinnulausum hefur hins vegar fækkað þegar litið er til þróunar innan ársins 2011.

Á þriðja ársfjórðungi 2011 voru 0,9% af þeim sem voru á vinnumarkaði atvinnulausir í 1–2 mánuði en 1,1% á þriðja ársfjórðungi 2010. Langtímaatvinnulausir voru 1,7% vinnuaflsins á þriðja ársfjórðungi 2011 samanborið við 1,5% sama tíma árið 2010.

Fjöldi starfandi á þriðja ársfjórðungi 2011 var 171.800 manns og fjölgar um 1.600 frá sama tíma ári áður. Á vinnumarkaði voru alls 182.500 manns sem jafngildir 81% atvinnuþátttöku. Atvinnuþátttaka karla var 84,4% en kvenna 77,6%. Til þeirra sem eru á vinnumarkaði teljast bæði þeir sem eru starfandi og atvinnulausir. Fólk telst vera starfandi ef það hefur unnið eina klukkustund eða meira í viðmiðunarviku könnunar eða verið fjarverandi frá starfi sem það gegnir að öllu jöfnu.

Á þriðja ársfjórðungi 2010 voru alls 181.900 á vinnumarkaði og atvinnuþátttaka mældist þá 81,4%. Atvinnuþátttaka karla var þá 84,1% og kvenna 78,6%.

• 1 blogg um fréttina

Bloggað um fréttina

• GunniS: þessar tölur eru ekki réttar