Innlent | mbl | 21.10.2011 | 17:23 | Uppfært 21:34

Mun klára aðildarviðræðurnar

Jóhanna Sigurðardóttir setur landsfund Samfylkingarinnar nú síðdegis. mbl.is/Golli

Jóhanna Sigurðardóttir forsætisráðherra sagði í setningarræðu sinni á landsfundi Samfylkingarinnar nú síðdegis að ríkisstjórnin mundi klára aðildarviðræðurnar við Evrópusambandið.

„Við munum klára þetta mál. Til þessa verks vorum við kosin og því umboði verðum við trú, allt til enda," sagði Jóhanna. „Áður en gengið verður til kosninga verðum við að ljúka aðildarviðræðum okkar við ESB."

Hún sagði að Íslendingar hefðu alla möguleika á að sækja fram og hefja kraftmikla lífskjarasókn, ekki síst ef það tækist að ljúka aðildarviðræðunum á tilskildum tíma og þjóðin yrði sammála samfylkingarfólki um kosti aðildar.

„Tilraunir ESB-andstæðinga, meðal annars forystu Sjálfstæðisflokks og Framsóknarflokks, hafa blessunarlega mistekist, að stöðva viðræðurnar áður en niðurstöður þeirra liggja fyrir. Vaxandi meirihluti þjóðarinnar vill klára viðræðurnar og sjá hvað í samningi gæti falist og hafnar því að fulltrúar flokkanna taki þann lýðræðislega rétt af þjóðinni," sagði Jóhanna.

Hvorki Sjálfstæðisflokkur né Framsóknarflokkur stjórntækur

Hún fjallaði talsvert um stjórnarandstöðuflokkana tvo og sagði m.a. að stefna þeirra ætti ekkert erindi við íslensku þjóðina lengur. Sagði Jóhanna að það hefði verið hugmyndafræði Sjálfstæðisflokks og Framsóknarflokks um hinn frjálsa, hagkvæma markað, sem átti að leysa málin ef eignagleðin fengi að ráða för, laus við óþarfa eftirlit og hömlur í nafni almannahagsmuna.

„Það var eignagleðin, eins og leiðtogi sjálfstæðismanna til 14 ára kaus að kalla græðgina, sem olli hruninu," sagði Jóhanna.

Hún sagði að hvorki Sjálfstæðisflokkur né Framsóknarflokkur væru stjórntækir fyrr en þeir viðurkenndu ábyrgð sína, gerðu upp við hrunið og breyttu um stefnu í þeim grundvallarmálum sem hruninu ollu.

„Enn hefur ekkert uppgjör farið fram, en báðir flokkar og þau hagsmunaöfl sem að þeim standa leggja nótt við dag um að sannfæra þjóðina um að afleiðingar hrunsins megi skrifa á reikninga núverandi ríkisstjórnar," sagði Jóhanna.

Aukinn jöfnuður bætir heilsu

Þá sagði Jóhanna að með auknum jöfnuði ykist traust og samstaða fólks í samfélaginu.

„Glæpum mun fækka, streita mun minnka, geðsjúkdómar, hjartasjúkdómar, vímuefnaneysla, næringarvandamál og fleiri þekkt einkenni velmegunarsamfélags munu minnka samhliða auknum jöfnuði. Það munu niðurstöður Richards Wilkinsons sýna okkur fram á hér á landsfundinum," sagði Jóhanna.

Efnahagsleg og samfélagsleg nauðsyn

Jóhanna sagði að ríkisstjórnarsamstarf Samfylkingarinnar og VG markaði ekki aðeins söguleg þáttaskil heldur hefði árangur hennar sýnt að hún hefði verið efnahagsleg og söguleg nauðsyn.

„Þrátt fyrir ýmsar erfiðar uppákomur og þrátt fyrir að kvarnast hafi úr meirihlutanum vegna brotthvarfs úr þingflokki samstarfsflokksins hefur samstarfið gengið vel og það hefur verið ótrúlega árangursríkt," sagði hún.