Innlent | mbl | 29.10.2011 | 20:02

Samið fyrirfram um ESB umsókn

Atli Gíslason, þingmaður, segir að búið hafi verið að semja um aðildarumsókn Íslands að Evrópusambandinu í þröngum hópi manna í VG við Samfylkinguna fyrri þingkosningar 2009.

„Þetta hófst með landsfundi 2009 þá var samþykktum flokksins breytt og opnað fyrir umsókn. Fyrir það var algjör neitun á öllu ESB daðri í samþykktum flokksins. Ég hef heimildir fyrir því að samið hafi verið um umsóknaraðild í þröngum hópum fyrir kosningar 2009.“

Atli segir enn fremur að daginn eftir kosningar hafi hann fengið tiltal frá mönnum innan VG vegna ummæla hans um að ekki ætti að sækja um aðild að Evrópusambandinu.

„Ríkisstjórnin er mjög einbeitt að vinna að inngöngu Íslands í ESB og nú er verið að innleiða fjöldann allan af regluverki sambandsins til þess að hægt verið að ganga inn í Evrópusambandið. Þetta er aðlögunarferli sem Evrópusambandið kom á eftir að Noregur sagði nei við inngöngu í seinna skiptið. Það gengur ekki að kjósa eigi um inngöngu eftir að búið er að innleiða allt regluverk sambandsins.“

Atli hyggur ekki á stofnun nýs framboðs eða flokks en segist styðja við ný framboð sem muni hafa stefnumál að leiðarljósi sem samræmist hans hugsjónum.