6½ árs fangelsi fyrir kynferðisbrot

43 ára gamall karlmaður hefur verið dæmdur í sex og hálfs árs fangelsi fyrir ítrekuð  kynferðisbrot gegn ungum dreng. Maðurinn er einnig dæmdur til að greiða drengnum þrjár milljónir króna í bætur og 2/3 hluta sakarkostnaðar.

Héraðsdómur Reykjaness segir að brot mannsins séu mjög alvarleg og sýni einbeittan og markvissan brotavilja. Þau séu unnin skipulega og beinist að ungum dreng sem maðurinn hafi gert sér far um að vingast við til þess að þjóna markmiðum sínum.

Fram kemur í dómi að afdráttarlaus játning mannsins liggi fyrir. Í dómskýrslu lýsir maðurinn háttsemi sinni og atvikum nánar með þeim hætti að hann hafi brotið gegn drengnum kynferðislega með því að fróa honum og hafa við hann munnmök.

Sagði maðurinn að brotin hefðu byrjað þegar drengurinn var um tíu ára.

Þá kemur fram að í játningu mannsins felist viðurkenning á að hann hafi í níu skipti haft munnmök við drenginn og fróað honum ekki sjaldnar en 24 sinnum frá því að hann var um það bil tíu ára gamall þar til upp úr áramótunum síðustu.

Segir að maðurinn hafi kynnst drengnum þegar hann var fimm ára gamall þegar maðurinn fór að búa með móður drengsins. Maðurinn hafi svo farið að hitta drenginn þegar hann var sex til sjö ára gamall og hafi það verið sem næst einu sinni til tvisvar í mánuði og hafi ástæðan verið sú að móðir hans hafi beðið þá sambýlingana að annast hann vegna þess að hann var oft einn eftir skóla.

Alvarleg og fastmótuð barnahneigð

Fjölskipaður héraðsdómur segir í niðurstöðu sinni, að maðurinn hafi gróflega misnotað þann trúnað sem honum var sýndur. Hafi brotin staðið yfir um árabil án afláts utan þess tíma sem maðurinn afplánaði fangelsisdóm fyrir kynferðisbrot. Sakarferill mannsins sé varðaður samkynja brotum sem beri þess skýran vott að ákærði er haldinn alvarlegri og fastmótaðri barnahneigð eins og fram komi í sálfræðilegu mati og lýsi sér í kynhneigð til drengja. Aðstoð sem hann hafi fengið af þessum sökum hafi engan árangur borið.

Þá veki óhug sú frásögn mannsins, að þegar hann hafi verið að fróa drengnum á heimili hans hafi hann ekki betur séð að drengurinn hafi notið þess auk þess að hafa stundum átt upptökin en það hafi verið sitt á hvað.  

„Verður ekki fram hjá því litið að ungum drengjum stafar mikil hætta af manninum eins og dæmin sanna. Maðurinn á sér engar málsbætur og ítrekaðar refsingar fyrir kynferðisbrot hafa engan árangur borið. Hann hefur hafist handa við fyrri iðju eins og ráða má af því að hann rýfur tvívegis reynslulausn sem hann hefur fengið og heldur áfram á sömu braut og lætur sér ekki segjast," segir í dómi héraðsdóms. 

Þar kemur fram, að maðurinn hafi áður verið dæmdur fyrir kynferðisbrot gegn tveimur drengjum og ítrekað fyrir að vera með og dreifa barnaklámi.  

• 1 blogg um fréttina

Bloggað um fréttina

• Stefán Óli Sæbjörnsson: Hverslags dómur er þetta?