Jón njóti sannmælis

„Látum menn njóta sannmælis. Líka Jón Bjarnason,“ segir Ögmundur Jónasson innanríkisráðherra í pistli sem hann birtir á bloggsíðu sinni. Hann fjallar þar um forsíðufrétt í Fréttablaðinu í dag þar sem fram kemur að Jón hafi samþykkt 600 milljóna styrkveitingu frá ESB með því að styðja fjárlögin.

„Einhverjir lesendur kynnu að ætla að tilgangur fréttarinnar sé að upplýsa um afstöðu ráðherrans til Evrópusambandsins og styrkja þaðan komna, eða hvað? Líklegra þykir mér að einhverjir „vinir" Jóns Bjarnasonar hafi komið á framfæri við fjölmiðla þeim upplýsingum að ósamræmis gæti í málflutningi hans annars vegar og gjörðum hans hins vegar,“ skrifar Ögmundur.

Hann segir rétt að Jón hafi, eins og aðrir ráðherrar, stutt fjárlögin. „Það breytir því ekki að enginn maður hefur beitt sér af meira afli og meiri innri sannfæringu en einmitt hann gegn styrkveitingum frá ESB. Það á við um málflutning hans í þingflokki VG og í öðrum stofnunum flokksins, á fundum ríkisstjórnar og hvað varðar stofnanir sem undir hans ráðuneyti heyra. Á milli orða og athafna hefur verið fullt samræmi - meira að segja svo mjög að mörgum hefur þótt nóg um,“ skrifar Ögmundur.

„Í frásögn af atkvæðagreiðslu um fjárlög þótti hins vegar greinilega vera færi að veikja Jón Bjarnason, grafa undan trúverðugleika hans.

Ég skrifa þennan litla pistil til að segja eftirfarandi: Látum menn njóta sannmælis. Líka Jón Bjarnason!“

• 2 blogg um fréttina

Bloggað um fréttina

• Óðinn Þórisson: Stuðningur VG við umsókn SF verður honum að falli
• Þorsteinn H. Gunnarsson: Úr prófkjörsannál Samfylkingarinnar í NV-kjördæmi 1998