Hefði þurft meiri tíma

Kristján Þór Júlíusson, þingmaður Sjálfstæðisflokksins og nefndarmaður í fjárlaganefnd, er ósáttur við afgreiðslu meirihlutans á fjárlögunum 2012 út úr nefndinni í dag. „Við töldum að það þyrfti að gefa þessu meiri tíma til umræðu og yfirferðar. Þetta var í rauninni bara annar fundurinn þar sem var eitthvað rætt um innihaldið í fjárlögunum eftir aðra umræðu. Við komum fram með þær athugasemdir eftir aðra umræðu sem okkur þótti full ástæða til að ræða betur og að sumu leyti er meirihlutinn að mæta þeim sjónarmiðum en að okkar mati er ekki gengið nægjanlega  langt á sumum sviðum, sérstaklega varðandi heilbrigðis- og öldrunarmál.“

Kristján Þór hefði viljað meiri tíma til að fara ofan í þær breytingar sem er verið að gera á fjárveitingum til heilbrigðismála. „Þó að vissulega sé bætt í á sumum stöðum eru ýmis viðfangsefni skilin eftir í lausu lofti.  Það er t.d. ekki komið til móts við landsmenn í umkvörtunum  í öldrunarþjónustu. Það eru ýmsir svona þættir sem mér finnst menn ekki mæta með þeim sóma sem við viljum öll hafa um þessa tvo mikilvægu málaflokka.“

Hvernig á að fjármagna nýtt fangelsi?

Losarabragur var á meðferð fjárlaganna hjá meirihlutanum að mati Kristjáns Þórs. Hann segir nefndarfundinn í gær hafa verið skelfilegan en útfærsla málsins hafi verið með betra formi í dag hjá meirihlutanum.  „Það er ýmislegt þarna inni sem er þess eðlis að við hljótum að kalla á fyllri umræðu um ákveðna þætti t.d. hvaða ákvörðun er verið að taka við byggingu fangelsis. Tillaga meirihlutans gerir ráð fyrir því að það verði hafist handa við byggingu á Hólmsheiði og lagfæringar á Litla-Hrauni en enn er ekki búið að svara þeirri spurningu hvernig á að fjármagna nýbygginguna, hvort það verður í einkaframkvæmd eða ríkisframkvæmd. Svo má setja spurningarmerki við forgangsröðum meirihlutans varðandi útgjöld í ýmis verkefni sem eru lögð til og við munum koma að í okkar nefndaráliti og umræðum um fjárlögin á þriðjudaginn,“ segir Kristján Þór.

Atkvæðagreiðsla um fjárlögin fer fram í þinginu á miðvikudaginn.

• 1 blogg um fréttina

Bloggað um fréttina

• Haraldur Haraldsson: Hefði þurft meiri tíma//// þetta er hörmung og gengur einfaldldega …