Skýrsla tekin af leigubílstjóranum

Búið er að taka skýrslu af leigubílstjóranum sem lögregla lýsti eftir vegna nauðgunarkæru á hendur Agli Einarssyni. Bílstjórinn gaf sig fram í dag og að sögn Björgvins Björgvinssonar, yfirmanns rannsóknardeildar kynferðisbrota, er þar með talið að búið sé að ná til allra vitna sem vitað er um í málinu.

Björgvin sagðist ekki geta gefið neinar upplýsingar um hvort vitnisburður leigubílstjórans samræmdist þeirri atburðarás sem kærða hefur lýst eða hvort hann hefði áhrif á framvindu málsins. Rannsóknin heldur áfram en að sögn Björgvins er að því stefnt að henni verði lokið í næstu viku eða vikunni þar á eftir.

Aðspurður hvort frekari yfirheyrslur eigi eftir að fara fram segir Björgvin að það verði þá helst til að bera ákveðin atriði undir málsaðila sem þegar hafa verið yfirheyrðir.

• 1 blogg um fréttina

Bloggað um fréttina

• Haraldur Haraldsson: Skýrsla tekin af leigubílstjóranum/ vonandi að það sanna komi þarna …