Næstmesta brottflutningsárið

Samtök atvinnulífsins segja Jóhönnu Sigurðardóttur ekki fara með rétt mál í fréttum Ríkisútvarpsins, að fólksflutningar núna séu ekkert meiri en í venjulegu árferði. Að óbreyttu stefni í næstmesta brottflutningsár Íslendinga í sögunni. 

„Þetta er því miður ekki rétt hjá forsætisráðherra,“ segir í umfjöllun á vefsíðu SA vegna ummæla forsætisráðherra í fréttum í dag.

SA benda á að samkvæmt upplýsingum Hagstofunnar hafi brottfluttir umfram aðflutta verið tæplega 1.400 á fyrstu níu mánuðum þessa árs. „Brottfluttir íslenskir ríkisborgarar umfram aðflutta voru 1.320 og erlendir voru 80. Ef fram heldur sem horfir verða brottfluttir íslenskir ríkisborgarar umfram aðflutta 1700-1800 á árinu öllu. Ef svo fer verður árið 2011 næstmesta brottflutningsár Íslendinga í sögunni í fjölda einstaklinga talið. Einungis árið 2009 er hærra með tæplega 2.500 brottflutta Íslendinga umfram aðflutta en árið 2010 voru þeir 1.700,“ segir í umfjöllun SA.  

Þar segir einnig að í lok september þessa árs hafi íbúar landsins verið 319.090 og fjölgað  um 600 frá áramótum. „Ef ekki hefði komið til 1.400 manna brottflutningur umfram aðflutta hefði fjölgunin numið 2.000.“

• 4 blogg um fréttina

Bloggað um fréttina

• Magnús Helgi Björgvinsson: Held að Samtök atvinnulífsins ættu að tala við vini sína …
• Gunnar Th. Gunnarsson: "Forsætisráðherra veruleikafirrtur eða heldur að við séum fávitar"
• Gunnar Heiðarsson: Að velja sér viðmið að hæfi
• Ólafur Ragnarsson: "Jarðsambandsleysi forsetisráðherra"