Búist við versnandi færð og slæmu skyggni

Veðurfræðingur Vegagerðarinnar segir að spáð sé vaxandi vindi og ofankomu á svæðinu frá Skaga og austur að Vopnafirði í kvöld. Því megi búast við versnandi færð og slæmu skyggni. Skafrenningur verði líklega viðvarandi bæði á Vestfjörðum og Austfjörðum.

Fram kemur í tilkynningu frá Vegagerðinni að það sé hálka á  Sandskeiði og hálkublettir á Hellisheiði og í Þrengslum.

Á Suðurlandi er annars hálka, hálkublettir eða snjóþekja.

Hálkublettir eru á Reykjanesbraut og Grindavíkurvegi. Snjóþekja er á Suðurstrandavegi.

Á Vesturlandi er hálka eða hálkublettir á öllum aðalleiðum.

Á Vestfjörðum er hálka á Steingrímsfjarðarheiði og þæfingsfærð og skafrenningur er  á Þröskuldum. Þungfært og snjókoma er á Klettshálsi.  Hálka eða snjóþekja er á öðrum leiðum og sumstaðar skafrenningur.

Norðanlands er snjóþekja og snjókoma eða skafrenningur á flestum leiðum. Hálka á Öxnadalsheiði en snjóþekja og snjókoma á Víkurskarði. Þæfingsfærð og skafrenningur er á Þverárfjalli, Vatnsskarði og á Hólasandi.

Á Austurlandi er snjóþekja og skafrenningur á Fagradal,  annars er hálka á öllum öðrum leiðum. Ófært er á Breiðdalsheiði og Öxi.

Á Suðausturlandi er hálka.

• 1 blogg um fréttina

Bloggað um fréttina

• Kristján H. Kristjánsson: Akurgæsir og álftir, etv. frá Íslandi, vekja athygli í Ísrael.