Engin áhrif á tollheimtuna

Breyting sú á lögum um virðisaukaskatt, að rafrænt afhent vara og þjónusta sem keypt er á netinu beri íslenskan virðisaukaskatt, hefur engin áhrif á tollheimtu samkvæmt upplýsingum frá embætti Tollstjóra.

Líklegt er að ein helstu áhrifin af breytingunni, sem greint var frá á mbl.is fyrr í morgun, verði á verslun með rafbækur, t.d. frá Amazon.com, en sem stendur er ekki lagður neinn tollur á bækur.

Svokallað tollmeðferðargjald, sem margir hafa orðið varir við þegar þeir hafa keypt sér venjulegar prentaðar bækur á Amazon og fengið sendar heim, er hins vegar ekki og verður ekki lagt á rafbækurnar sem fólk halar niður. Samkvæmt upplýsingum frá Tollstjóraembættinu er tollmeðferðargjaldið í raun ekki gjald sem rennur í ríkissjóð þótt nafn þess hljómi svo sannarlega þannig. Það er gjald sem rennur til Póstsins fyrir umstang hans við að koma vörunum í gegnum tollafgreiðslu. Tollmeðferðargjaldið er þannig ekki tollur.

Þetta þýðir að tollmeðferðargjald verður áfram innheimt af prentuðum bókum sem keyptar eru á netinu, en ekki af rafbókum sem halað er niður. Fyrrnefnd breyting á lögunum um virðisaukaskatt átti enda aðeins við um „rafrænt afhenta" vöru og þjónustu, eins og þar segir, en undir það falla ekki prentaðar heimsendar bækur.

Fyrri frétt mbl.is um málið.

• 1 blogg um fréttina

Bloggað um fréttina

• Jóhann Elíasson: OG HVER ER SVO FRÉTTIN?????????????