Innlent | mbl | 22.12.2011 | 14:46

Verðmerkingum hætt og verð hækkar

mbl.is/Eyþór

Neytendasamtökin velta fyrir sér hvort bann við forverðmerkingum á kjöti kunni að skýra að hluta þá miklu verðhækkun sem hefur orðið á kjöti milli ára.

„Þegar verðkönnun á jólamatnum sýnir allt að 41% hækkun á milli ára hljóta að vakna spurningar hjá neytendum. Í könnun ASÍ sem birt var í fyrradag kemur fram að miklar verðhækkanir hafa orðið m.a. á kjöti og langt umfram eðlilegar forsendur. Það sem vekur þó sérstaka athygli er að hækkanir eru mjög mismunandi frá einni verslunarkeðju til annarrar,“ segir á vef Neytendasamtakanna.

Þannig hækkar birkireykt úrbeinað hangilæri frá SS um 41% hjá Hagkaupum en lækkar í verði um 7% hjá Nettó. Skýringar verslana eru að miklar hækkanir hafi orðið á kjöti milli ára eða á bilinu 20-45%. Hagfræðingur Bændasamtakanna sagði hinsvegar í viðtali að verð til bænda hafi hækkað um 17%. Þar er væntanlega vísað til verðhækkana á lambakjöti, segir enn fremur á vef Neytendasamtakanna.

„Fyrr á þessu ári voru forverðmerkingar (verðmerkingar kjötiðnaðarstöðva) bannaðar á kjötvörum. Neytendasamtökin hafa óskað eftir því að stjórnvöld rannsaki hvaða áhrif þessi ákvörðun hafi haft á verð til neytenda. Neytendasamtökin ítreka hér með þá ósk sína. Það er óásættanlegt ef milliliðir (kjötiðnaðarstöðvar og/eða verslanir) hafi nýtt sér þessa breytingu til að hækka álagningu sína. Ef svo er hefur bann við forverðmerkingum algjörlega misst marks en tilgangurinn var einmitt að auka verðsamkeppni með þessa vöru sem myndi hugsanlega leiða til lægra verðs til netyenda.

Það er því eðlilegt að verðmyndun á kjötvörum verði rannsökuð vandlega. Einnig er eðlilegt að fram komi hvernig einstakir aðilar á markaði hafi hagað verðlagningu sinni síðan samkeppnisyfirvöld bönnuðu forverðmerkingar,“ segir á vef Neytendasamtakanna.