Húsdýrin fengu jólagesti

Dýrin þurfa sinn bita og umhyggju um jólin eins og aðra daga ársins og starfsfólk Húsdýragarðsins mætti til vinnu í morgun til að sinna skepnunum. Opið var fyrir gesti frá 10 til 12 meðan gefið var og lögðu ýmsir leið sína í Laugardalinn til að heilsa upp á dýrin.

Auk hinna hefðbundnu dýra sem þar búa dvelur nú myndarlegur kvenfálki í Húsdýragarðinum, en hann var færður þangað eftir árekstur við flutningabíl á sunnanverðu Snæfellsnesi. Fálkinn mun dvelja í garðinum fram yfir jól og þiggur þar kræsingar sem dýrahirðar garðsins reiða fram, en tíminn mun leiða í ljós hvort hann nær sér að fullu.

Fálkinn er ekki eini óvenjulegi gesturinn í Húsdýragarðinum því jólakötturinn hefur einnig haft aðsetur þar. Ekki er búist við að hann fari heim í fjöllin fyrr en með síðustu jólasveinunum svo hægt er að kíkja á bæli hans milli jóla og áramóta, en opið verður í Húsdýragarðinum  frá klukkan 10 til 17 á morgun.

• 1 blogg um fréttina

Bloggað um fréttina

• Jóhannes Ragnarsson: Helvítis lygi á jóladag