Þungfært við Vík

Það er hálka á Hellisheiði og hálka og skafrenningur í Þrengslum. Á Suðurlandi er hálka á flestum leiðum þó er þæfingur og snjóþekja á fáfarnari leiðum. Þungfært og skafrenningur er við Vík.  Á Suðausturlandi er snjóþekja, hálka og snjókoma. Þæfingsfærð og skafrenningur er frá Vík að Kirkjubæjarklaustri.

Hálka er á Reykjanesbraut og á Grindavíkurvegi. Þæfingsfærð er á Suðurstrandarvegi.

Á Vesturlandi er víðast hvar hálka eða snjóþekja. Hálka er á Fróðárheiði og Vatnaleið. Snjóþekja er á Holtavörðuheiði og Bröttubrekku.

Á Vestfjörðum er víðast hvar hálka eða snjóþekja en sumstaðar þæfingsfærð og er unnið að hreinsun. Þungfært er í Ísafjarðardjúpi. Ófært er á Kleifaheiði.

Snjóþekja er víða á Norðurlandi, snjóþekja og snjókoma er á Vatnsskarði.

Á Norðaustur- og Austurlandi er víðast hvar hálka en sumstaðar snjóþekja. Hálka og skafrenningur er á Hólasandi.

Þæfingsfærð og skafrenningur er á milli Breiðdalsvíkur og Hafnar. Snjóþekja eða þæfingur er á fáeinum útvegum, samkvæmt upplýsingum frá Vegagerðinni.

• 1 blogg um fréttina

Bloggað um fréttina

• Njörður Helgason: Vetrarveður rifjast upp.