Ólafur Ragnar maður ársins á Stöð 2

Ólafur Ragnar Grímsson, forseti Íslands, var í dag valinn maður ársins á Stöð 2. Valið var tilkynnt í Kryddsíldarþætti Stöðvar 2 í dag.

Ólafur Ragnar sagði í þættinum að sú spurning hefði brunnið á sér hvort hann ætti að bjóða sig fram til endurkjörs í embætti forseta Íslands.

Mjög margt fólk hefði haft samband við sig og hvatt sig til þess að bjóða sig fram. Ólafur Ragnar gaf ekki upp í þættinum hvort hann myndi bjóða sig fram næsta sumar og vildi heldur ekki upplýsa hvort það kæmi fram í nýársávarpi hans á morgun. Ólafur Ragnar sagðist geta upplýst að hann kæmi inn á þetta í ávarpinu á morgun.

Næsta sumar hefur Ólafur Ragnar gegnt embætti forseta Íslands í sextán ár.

Aðspurður hvort Ólafur Ragnar óttaðist niðurstöðu ESA í Icesave-málinu svaraði hann því neitandi. Málið snerist ekki um regluverk fjármálakerfisins eða ákvarðanir í einhverjum eftirstofnunum heldur um vilja þjóðarinnar. Ákvörðunin hefði ekki verið auðveld og hann óskaði engum að þurfa að standa frammi fyrir slíkri ákvörðun. Samningarnir tveir sem komu inn á hans borð hefðu verið um margt ólíkir.

Hann segir samband sitt við Jóhönnu Sigurðardóttur og Steingrím J. Sigfússon með miklum ágætum og þau hafi einmitt rifjað það upp í morgun á ríkisráðsfundi að þau hafi setið við þetta sama borð sem ráðherrar í ríkisstjórn fyrir um tuttugu árum. Hann segir engum blöðum um að fletta að ríkisstjórn sú sem situr nú hafi glímt við meiri erfiðleika en nokkur önnur ríkisstjórn.

• 1 blogg um fréttina

Bloggað um fréttina

• Svanur Gísli Þorkelsson: Maður sem þorir, getur og vill