Málið átti að kynna skilyrðislaust

Bæjarráð Hveragerðisbæjar undrast það að ekki skuli hafa verið leitað álits bæjarins við útgáfu starfsleyfis til handa Orf líftækni á Reykjum. Hefur bæjarstjóra verið falið að óska eftir fundi með hlutaðeigandi aðilum.

Þetta kemur fram á vef bæjarins.

Þar segir að á fundi bæjarráðs á fimmtudag hafi verið lögð fram greinargerð frá tíu stofnunum, samtökum og einstaklingum þar sem fjallað sé um forsendur og álitamál vegna starfsleyfis fyrirhugaðrar ræktunar Orf líftækni hf. á Reykjum. Ennfremur hafi á fundinum verið lögð fram skýrsla unnin af „Kynningarátaki um erfðabreyttar lífverur“ en að því standa Landvernd, Matvæla- og veitingafélag Íslands, Náttúrulækningafélag Íslands, Neytendasamtökin, Slow food Reykjavík og Vottunarstofan Tún.

Afgreiðsla bæjarráðs var eftirfarandi:

„Bæjarráð undrast það að ekki skuli hafa verið leitað álits Hveragerðisbæjar við útgáfu starfsleyfis til handa Orf líftækni að Reykjum og telur að skilyrðislaust hefði átt að kynna þetta mál fyrir bæjarstjórn eða á opnum fundi með íbúum. Þrátt fyrir að Reykir tilheyri sveitarfélaginu Ölfusi, stjórnsýslulega séð, þá eru landfræðilegar aðstæður með þeim hætti að allt sem þar gerist hefur áhrif í Hveragerði enda eru ekki nema 150 metrar frá umræddu tilraunagróðurhúsi í næsta íbúðarhús bæjarins og um 350 metrar í miðbæinn. Þessi staðreynd ein og sér ætti að nægja til að Hvergerðingum yrði kynnt hvernig starfsemi Orf líftækni á að fara fram. Bæjarráð felur bæjarstjóra að óska eftir fundi með hlutaðeigandi aðilum sem skýrt getur þau sjónarmið sem búa að baki umræddri leyfisveitingu.“

• 1 blogg um fréttina

Bloggað um fréttina

• Ragnar Kristján Gestsson: Kynningarátaksskýrslan?