Ísing og selta olli trufluninni

Truflunin sem varð í tengivirki Landsnets á Brennimel í Hvalfirði í kvöld stafaði af mikilli ísingu og seltu. Þetta kemur fram í tilkynningu frá Landsneti. Þar segir einnig að rafmagn sé komið til allra notenda á ný að undanskildu Járnblendifélaginu en vonast er til að úr því rætist bráðlega.

Truflunin sem telst alvarleg varð upp úr klukkan sex í kvöld. Ísingin og seltan ollu yfirslætti á búnaði í tengivirkinu og í kjölfarið urðu álver Norðuráls og Járnblendifélag Íslands straumlaus í tæpar fjórar klukkustundir. Þá munu einnig hafa orðið truflanir á afhendingu rafmagns víða um land vegna veðurhamsins, einkum á Vesturlandi, Vestfjörðum og Suðurlandi.

Starfsmenn Landsnets vinna að viðgerðum á háspennulínum og í spennistöðinni á Brennimel til að koma rekstrinum í fyrra horf.

• 2 blogg um fréttina

Bloggað um fréttina

• Guðrún María Óskarsdóttir.: Náttúruöflin sjá um seltuna.
• Viggó Jörgensson: Sýnir hvað við stöndum tæpt.