Ákvörðunin hjá stjórnvöldum

Stjórn Vaðlaheiðarganga segir það sé ákvörðun stjórnvalda hvort af framkvæmdinni verður þar sem stjórnvöld tryggja fjármögnun verkefnisins. Þetta er meðal þess sem kemur fram í yfirlýsingu sem stjórn Vaðlaheiðarganga hefur sent frá sér. Í ljósi umræðu undanfarinna daga og framkominna greinargerða um Vaðlaheiðargöng hefur stjórn Vaðlaheiðarganga hf. ákveðið að senda eftirfarandi yfirlýsingu til fjölmiðla. Hlutverk Vaðlaheiðarganga hf. er að vinna að faglegum undirbúningi og framkvæmd verkefnisins, segir í yfirlýsingunni.

Vaðlaheiðargöng hf. var stofnað á Akureyri 9. mars 2011 og er tilgangur félagsins að annast undirbúning og framkvæmd við ný göng undir Vaðlaheiði sem tengja munu Eyjafjörð og Fnjóskadal og stytta þannig þjóðveginn um 16 km.

Eigendur félagsins eru Vegagerðin (51%) og Greið leið ehf. (49%). Félagið var stofnað í kjölfar ákvörðunar stjórnvalda um að halda áfram undirbúningi við gerð ganganna í kjölfar viðræðuslita ríkisins og lífeyrissjóða um fjármögnun samgönguverkefna. Stofnun og tilgangur félagsins byggði á lögum um stofnun hlutafélaga um vegaframkvæmdir.

„Framhald verkefnisins var háð þeirri forsendu að ríkissjóður myndi fjármagna verkefnið á framkvæmdatíma og að notendagjöld myndu alfarið standa undir fjármögnun verkefnisins til lengri tíma,“ segir í yfirlýsingunni.

Á seinni hluta síðasta árs var útboð á stærstum hluta verklegra framkvæmda og liggur fyrir tilboð frá IAV/Marti í þá verkþætti sem eru 5% undir kostnaðaráætlun varðandi þann þátt. Nú liggja fyrir tilboð eða uppfærðar kostnaðaráætlanir fyrir alla þætti framkvæmdarinnar.

Félagið hefur átt í viðræðum við fjármálaráðuneyti um fyrirkomulag fjármögnunar á framkvæmdatíma. Niðurstöður úr útreikningum varðandi endurgreiðslu lána vegna fjármögnunarinnar hafa verið kynntar ráðuneytinu ásamt því að farið hefur verið ítarlega yfir forsendur.

Verkefnið getur endurgreitt lán að fullu

Niðurstaða útreikninga varðandi endurgreiðslur lána eru þær að verkefnið geti endurgreitt lán að fullu á grundvelli veggjalda út frá þeim forsendum sem kynntar hafa verið.

„Á undanförnum dögum hafa verið kynntar tvær skýrslur um Vaðlaheiðargöng með skömmu millibili. Annars vegar er um að ræða skýrslu sem unnin var af Pálma Kristinssyni, verkfræðingi, og hins vegar IFS Greiningu. Skýrslurnar og niðurstöður þeirra eru um margt ólíkar.

Meginmunurinn er sá að í tilfelli Pálma er að hans sögn einkum byggt á upplýsingum sem veittar voru á opnum fundi í umhverfis- og samgöngunefnd hinn 7. nóvember sl. og reynslu verkfræðingsins af þeim verkefnum sem hann hefur komið að. Í tilfelli IFS Greiningar var unnið með þau gögn varðandi verkefnið sem helstu sérfræðingar landsins hafa unnið og yfirfarið.

Báðar skýrslurnar fjalla um sömu þætti en niðurstöðurnar eru mismunandi. Segja verður að niðurstöður Pálma Kristinssonar eru í meginatriðum frábrugðnar þeim niðurstöðum sem sérfræðingar og IFS Greiningar komast að í sinni vinnu.

Í skýrslum beggja er þó að finna ýmis atriði sem verða skoðuð gaumgæfilega. Það er von félagsins að ákvörðun um framhald og undirbúning Vaðlaheiðarganga verði tekin sem fyrst til að aflétta óvissu gagnvart verktökum og öðrum sem hagsmuni hafa af framkvæmdinni. Mikilvægt er að tafir á ákvörðun skaði verkefnið ekki enn frekar,“ segir í yfirlýsingunni sem stjórnarmenn Vaðlaheiðarganga rita undir, þau Kristín H. Sigurbjörnsdóttir, formaður, Kristján L. Möller og Pétur Þór Jónasson.

• 1 blogg um fréttina

Bloggað um fréttina

• Camel: Möller & Sigfússon co.