Veiðibann eina siðlega viðbragðið

Ástundun veiða úr hnignandi stofnun er siðlaus umgengni við náttúruna, óháð magni veiddra fugla. Veiðibann er eina siðlega viðbragðið við stofnhruni tegunda. Þetta segir í yfirlýsingu frá Fuglavernd, sem styður eindregið niðurstöðu meirihluta svartfuglanefndar Umhverfisráðuneytisins.

Starfshópur sem Svandís Svavarsdóttir umhverfisráðherra skipaði um verndun og endurreisn svartfuglastofna hefur m.a. lagt til að fimm tegundir sjófugla af svartfuglaætt verði friðaðar fyrir öllum veiðum og nýtingu næstu fimm árin.

Fuglavernd segir að veiðar, þar með talin eggjataka, séu ekki sjálfbærar úr stofnum sem ná ekki að viðhalda stofnstærð sinni af einhverjum orsökum, t.d. vegna fæðuskorts.
Hrun í varpstofnum margra íslenskra sjófuglastofna sé staðreynd og veiðibann eina siðlega viðbragðið við stofnhruni tegunda.

„Það hljóta að vera hagsmunir allra sem nýta svartfugla að stofnarnir séu sterkir og sjálfbærir. Öll sérhagsmunavarsla getur spillt tiltrú almennings á siðferði veiðimanna og eru ívilnanir sem þeir krefjast á fyrirkomulagi veiðistjórnunar í fullri andstöðu við varúðarreglu sem leyfir sjófuglum að njóta vafans,“ segir í yfirlýsingu Fuglaverndar.

Svartfuglar og ekki síst lundi gefi af sér miklar tekjur vegna ferðamanna sem koma til að skoða þessa fugla og þær tekjur hverfi þegar þeir grípa í tómt.

• 6 blogg um fréttina

Bloggað um fréttina

• Þórir Kjartansson: Skrítin aðferðafræði
• Gunnar Th. Gunnarsson: Hvorum er betur treystandi?
• Gunnar Heiðarsson: Er náttúran að fara illa með Svandísi ?
• Níels A. Ársælsson.: Svartfugl
• Davíð Þ. Löve: Betra að byrgja brunninn!
• Haraldur Rafn Ingvason: Spurningar um friðun sem þarf að svara