Að sögn Jónínu Rósar Guðmundsdóttur, þingmanns Samfylkingarinnar, er verið að skoða það að leggja fyrir þingið svokallaða rökstudda dagskrártillögu þess efnis að taka þingsályktunartillögu Bjarna Benediktssonar, formanns Sjálfstæðisflokksins, um afturköllun ákæru á hendur Geir H. Haarde af dagskrá þingsins.

Í umfjöllun um mál þetta í Morgunblaðinu í dag segir, að dagskrártillagan muni ganga út á það, að sögn Jónínu, að fyrri umræðan um tillögu Bjarna fari fram á föstudaginn, en að henni lokinni verði dagskrártillagan lögð fram og með henni verði lagt til að málinu ljúki með þeirri umræðu og síðan verði ekki frekar aðhafst í því.

Guðfríður Lilja Grétarsdóttir, þingmaður VG, gagnrýnir þessa dagskrártillögu og segir málið eiga það skilið að fá lýðræðislega meðferð í þinginu. Sjálf segist hún ætla að styðja þingsályktunartillögu Bjarna.

Bjarni skorar á andstæðinga þingsályktunartillögunnar að tefla fram efnislegum rökum í málinu í stað þess að beita klækjabrögðum til þess að koma í veg fyrir að vilji meirihluta þingsins fái framgöngu.

Tengdar fréttir

Landsdómur

Biðst afsökunar á sínum hlut í Landsdómsmálinu

• Vill að þingið biðji ráðherra afsökunar
• Tenging við Pólland langsótt
• Á von á skiptum skoðunum
• Alþingi álykti að málshöfðun hafi verið röng

» Fleiri tengdar fréttir