Innlent | mbl | 20.1.2012 | 16:52 | Uppfært 18:48

Iðnaðarsaltið ekki hættulegt

Salti mokað.

Matvælastofnun (MAST) segir að ekkert bendi til þess að neytendum stafi hætta af iðnaðarsalti, sem notað hefur verið í matvælaframleiðslu hér á landi.

Stofnunin segist engu að síður standa fast við þá afstöðu sína að í matvæli eigi eingöngu að nota salt sem framleitt er til matvælavinnslu.

MAST og Heilbrigðiseftirlit Reykjavíkur tóku sýni af saltinu til eigin efnagreiningar. Matís greindi sýnin og öll mæld aðskotaefni reyndust vel undir hámarksgildum skv. alþjóðlegum staðli fyrir matvælasalt. MAST segir að frekari gögn frá framleiðanda sýni einnig að aðskotaefnin í saltinu voru vel undir hámarksgildum. Saltmagn þess sé hátt sem þýði að saltið sé mjög hreint.

MAST segir að umrætt salt sé framleitt í lokuðu kerfi hjá Akzo Nobel í Danmörku og sé á öllum stigum framleiðsluferils varið fyrir utanaðkomandi mengun. Það sé flokkað með sigtun í iðnaðarsalt, þar sem hámarkskornastærð er 4 mm, og matarsalt þar sem hámarkskornastærð er 1,9 mm. Saltið sé geymt í sílóum þar til því sé pakkað. Fyrir pökkun sé salt til matvælavinnslu sigtað að nýju en iðnaðarsaltinu sé pakkað án frekari sigtunar. Saltið sé geymt í húsnæði sem sé þétt gagnvart vindi og regni.

Þá sé hráefnið, sem notað er til vinnslu á iðnaðarsalti, hið sama og notað sé til framleiðslu á salti til matvælaframleiðslu. Báðar tegundir salts séu framleiddar samkvæmt sömu gæðastöðlum.

Notkun iðnaðarsaltsins hefur þegar verið hætt. Matvælastofnun segist hafa yfirfarið verklag eftirlitsmanna við eftirlit með salti og öðrum efnum sem ætluð séu til íblöndunar í matvæli. Þá hafi stofnunin unnið að samræmingu eftirlits undanfarna mánuði og það hafi einmitt verið við slíka samræmingarskoðun sem verklag við eftirlit leiddi til þess að notkun iðnaðarsalts uppgötvaðist hjá kjötvinnslu.