Allir brjóstapúðar fjarlægðir

Ríkisstjórnin samþykkti í morgun tillögu Guðbjarts Hannessonar velferðarráðherra að fjarlægja alla brjóstapúða úr brjóstum þeirra kvenna sem þess óska. Aðgerðirnar verða gerðar á Landspítala og fara fyrstu konurnar í viðtöl á spítalanum í dag.

Velferðarráðherra lagði fram þessa tillögu eftir að hafa fengið tillögu um þetta frá landlækni, en hann mælir með því að lekir brjóstapúðar verði fjarlægðir.

Anna Sigrún Baldursdóttir, aðstoðarmaður velferðarráðherra, segir erfitt að áætla kostnað við þessar aðgerðir nákvæmlega því ekki sé vitað hversu stórar aðgerðir þurfi að gera á hverri konu. Eins sé óljóst hversu margar konur ætli að þiggja boð um að fara í aðgerð. Fyrsta áætlun gerir ráð fyrir að kostnaður sé 90-150 milljónir.

Anna Sigrún segir að ríkið muni ekki taka þátt í kostnaði við að setja nýja púða í stað þeirra sem leka. „Ástæðan er sú að þarna er um fegrunaraðgerðir að ræða og eins er það mat landlæknis og sérfræðinga að ekki eigi að setja nýja púða strax eftir aðgerðir.“

• 1 blogg um fréttina

Bloggað um fréttina

• Guðjón Sigþór Jensson: Mismunun?