Innlent | mbl | 20.2.2012 | 20:54

Kvarta undan sýslumönnum

Sýslumenn framkvæma fjárnám og nauðungarsölur mbl.is/Ómar

Í ljósi nýfallins dóms Hæstaréttar þar sem afturvirkir vaxtaútreikningar áður gengisbundins láns voru dæmdir ólögmætir hafa Hagsmunasamtök heimilanna (HH) sent innanríkisráðherra erindi þar sem ráðherra er hvattur til að beita sér fyrir því að lög um endurupptöku mála verði skýrð.

„Þetta er nauðsynlegt til að tryggt verði að allir þeir sem misst hafa eignir sínar, gert hefur verið árangurslaust fjárnám hjá eða gerðir hafa verið gjaldþrota síðastliðin ár á grundvelli ólögmætra gengistryggðra lána hafi skýlausan rétt til að taka upp sín mál aftur fyrir dómstólum, eða jafnvel að þau verði tekin upp sjálfkrafa.

Nú þegar dómstólar hafa komist að þeirri niðurstöðu að endurútreikningar standist ekki lög er það ljóst að sýslumenn sem framkvæmt hafa fjárnám, nauðungarsölur og gjaldþrotaúrskurði á grundvelli slíkra ólögmætra útreikninga hafa tekið sér dómsvald á meðan réttaróvissa ríkti, og þar með brotið stjórnsýslulög og jafnvel stjórnarskrá. Umrædd framganga sýslumanna er ógn við almannahagsmuni sem kann að baka ríkissjóði ómælda skaðabótaskyldu,“ segir í tilkynningu frá Hagsmunasamtökunum.

Auk þessa vilja samtökin kvarta undan framgöngu sýslumanna í ofangreindum málum þar sem skjöl hafa í mörgum tilvikum borið önnur samningsnúmer en þau sem hvíla á viðkomandi eign eða kröfu.

„Slíkur skáldskapur, sem auk þess er yfirleitt einungis undirritaður af öðrum aðila, þ.e. aðeins lánveitanda en ekki lántaka, getur ekki verið lögmætur grundvöllur fyrir aðför. HH fara fram á það við innanríkisráðherra að hann skipi eftirlitsnefnd sem hafi það hlutverk að fylgjast með framkvæmd fullnustugerða. Hafi sýslumenn látið fullnustugerðir fara fram á grundvelli slíkra samninga eru undirmenn ráðherrans mögulega brotlegir við lög,“ segir ennfremur í tilkynningu.