Bjórkvöld fór algjörlega úr böndunum

Bjórkvöld eins framhaldsskólans á höfuðborgarsvæðinu fór algjörlega úr böndunum síðustu helgi. Þegar lögreglan kom á staðinn voru þar 200-300 ungmenni og mörg þeirra undir áhrifum áfengis, en þau yngstu voru 16 ára. Sala áfengis var umsvifalaust stöðvuð og staðnum lokað.

Lögreglan minnir á að svokölluð bjórkvöld framhaldsskólanna á veitinga- og/eða skemmtistöðum eru ekki skólaböll og því er ekki sótt um leyfi fyrir samkomunum. Bjórkvöldin eru því alfarið á ábyrgð leyfishafa hlutaðeigandi staðar. 

Minnir lögreglan á að fáir nemar framhaldsskólanna eru orðnir 20 ára og er því ólögmætt að veita þeim áfengi. Enginn undir 20 ára aldri á að vera með áfengi við hönd og enginn undir 18 ára aldri á að vera yfir höfuð inni á slíkum stað nema í fylgd forráðamanna.

Undanfarið hefur lögreglan fylgst með dvöl ungmenna á veitinga- og skemmtistöðum og svo verður áfram. Reynslan sýnir að full þörf er á slíku eftirliti en lögreglan hvetur jafnframt rekstraraðila til að fara að lögum því annars geta þeir búist við viðurlögum, t.d. sviptingu eða afturköllun rekstrarleyfis.

• 1 blogg um fréttina

Bloggað um fréttina

• Ómar Ragnarsson: Krækja sem fyrst í góða viðskiptamenn !